Da 150 egn a la leta de la comunanza de Moena

Hella - We design cool shadows

Ujes averc aló da la caserma di Studafech Volontères de Moena. L é l 150° cedean del grop di Studafech e per l’ocajion l é stat endrezà na dì entria de festa en colaborazion co la Crousc Checena e l Socors da Mont. La jent de Moena e i ghes i à podù veder da vejin l zenter operatif e veder la preparazion di studafech te trei desmostrazions desvalives. I più picoi, enveze i à podù se sproèr te dotrei proes de abilità tel piazal de la caserma. Via per l domesdì de en sabeda ai 22 de jugn l president de la Provinzia Maurizio Fugatti l à portà dant sie salut e chel de la jonta provinzièla: “A Moena te chisc ultimes egn l é stat desvaliva situazions senestres da gestir – à dit l president – che les à tout ite duta Fascia. Recorde soraldut chel che l é sozedù sun Marmolèda, olache i Studafech i à podù dèr sie didament de gran valuta. L’atenzion la è semper auta e apontin per chest via per la setemènes passèdes l é stat endrezà na ejercitazion emportanta te chisc lesc, per veder l livel de coordenament e la colaborazion anter duc i gropes.

No l é segur mencià l didament di Studafech de Moena che rengrazie per l lurier de vigni dì e per chel che i fèsc da 150 egn en ca per sia comunanza”. À portà dant sie salut, dessema col Ombolt de Moena Alberto Kostner, ence l comandant del Grop di Studafech de Moena Giambattista Vanzo: “Tel Grop di Studafech Volontères de Moena – à declarà Vanzo l é 40 studafech e set arlieves. Ence se, vedù i bos che aon dintornvia, se podessa pissèr che nosc lurier sie destudèr feghes e fèr prevenzion, che aboncont l é ativitèdes che seghiton a fèr, ti ultimes egn aon mudà noscia atività soraldut a cajon di mudamenc climatics. Ades se cruzion ence de egajons, descheche l é sozedù per Vaia, estra che fèr tropes intervenc tecnics, desche per ejempie neteèr la strèda e didèr canche sozet azidenc.”

Cemin Sport
Martino Vanzo
Facebook
Twitter
WhatsApp
Email

Lascia un commento